PROVINCE OF CEBU- Personal nga nasaksihan ni Cebu Governor Pamela Baricuatro ang makaluluoy nga kahimtang sa Ricardo L. Maningo Memorial Hospital sa San Francisco, Camotes atol sa iyang inspeksyon gahapon, Agosto 8, 2025.
Kauban ang anak nga si Dr. Nikki Catalan ug si Provincial Administrator Atty. Ace Durano, nakita sa gobernador ang problema sa suga, nagtulo nga atop, ug naguba nga pasilidad.
Gitawag ni Baricuatro ang ospital nga gloomy ug delikado, hinungdan sa iyang direktiba sa pag-instalar og solar lights, pag-ayo sa atop,pagpintal sa mga bungbong ug pag-restock sa medikal nga gamit.
Gikumpirma ni Dr. Catalan nga nagsugod na ang assessment sa Provincial Engineering Office alang sa rehabilitasyon.
Nakita usab ang kakulang sa kagamitan, lakip ang panginahanglan sa CT scan machine ug ambulansya sa dagat ug kahanginan.
Gilauman nga mahatud ang duha ka sea ambulances sa Camotes ug Bantayan sulod sa unang 100 ka adlaw sa serbisyo ni Baricuatro.
Ang air ambulance, manginahanglan pa og approval gikan sa Malacañang.
Gisugo usab sa gobernador ang pagtuki sa wala pa mahuman nga bilding sa ospital compound.
