PROVINCE OF CEBU- Gibutyag ni Gobernadora Pamela Baricuatro nga ang Kapitolyo sa Sugbo adunay sobra sa P1.08 bilyon nga pondo alang sa Special Education Fund (SEF) nga hangtod karon wala pa magamit.
Kini nga pondo wala pa magamit bisan pa sa seryosong problema sa kakulang sa classrooms sa mga pampublikong tunghaan sa lalawigan, nga gibanabana nga molapas sa 3,000 ka mga lawak-saringan.
Matod sa Gobernadora, makigkita siya karong buwana sa Provincial School Board aron hisgutan ug aprobahan ang listahan sa mga prayoridad, ilabi na kung asa nga mga lungsod sa lalawigan ang labing nagkinahanglan og dugang nga classrooms.
Gikatakda unta nga gamiton ang SEF sa pagtukod og mga bag-ong classroom, pag-ayo sa mga eskwelahan nga nadaut sa Bagyong Odette, pagpamalit og gamit sa pagtudlo, pag-hire og dugang nga magtutudlo, ug pag-suporta sa mga feeding program sa mga tunghaan.
Sa pagkakaron, limitado pa lang ang paggasto sa SEF, nga naglangkob lamang sa mga yano nga butang sama sa notebooks ug school bags. Kini tungod sa kakulangan sa klaro ug detalyadong plano.
Sumala ni Provincial Administrator Ace Durano, ang pondo wala pa magamit tungod sa kakuwang sa plano ug mga kalihokan nga angay buhaton sa Provincial School Board.
Gipasabot niya nga ang SEF nagagikan sa 1% nga bahin sa real property tax sa Sugbo, ug kinahanglan kini og klaro ug aprobado nga plano aron magamit sa mas dagkong proyekto.
Gipasiugda ni Durano nga ang SEF usa ka dako nga oportunidad aron mapaayo ang kalidad sa edukasyon sa probinsya.
