CEBU CITY-Nangawat ang 29-anyos nga katabang og alahas sa iyahang amo nga nagkantidad og P1 million.
Giila nga si Jovelyn Nuez taga Purok 7, Santo Niño lungsod sa Talibon probinsya sa Bohol, kasamtangan nga nagtingkagol sa detention facilitity sa Talamban Police Station.
Miangkon ang suspetsado nga gikuha niini ang tulo ka singsing ug usa ka kwentas sa iyahang amo.
Nagkanayon ang hepe sa Talamban Police Station nga si Police Major John Marquez nga usa ka semana pa nga nahimong katabang si Nuez sa iyahang amo pinaagi sa iyahang kaila diin kini nihangyo nga mo-uli sa ilaha aron nga managkot.
Apan, nasayran nga sa wala pa kini mi-uli sa Bohol nakawat na niini ang lima ka items sa alahas ug ang bracelet iyahang giprinda og P60,000 human, mibalik sa iyahang amo aron mangawat pag-usab.
Dugang pa nga mo-sibat na unta kini dala ang iyahang bag nga may mga alahas apan gisusi sa tag-iya kung asa kini padung ug didto nasakpan.
Nasayran usab nga dili kini mao ang una nga pagpangawat sa suspek tungod nga nakasuway na kini og pangwat kaniadto sa ilahang lugar sa Bohol ug napriso sud sa usa ka semana.
Adunay gi-atubang nga upat ka kaso ang maong katabang sa Bohol ug desidido usab ang amo nga pasakahan kini og qualified theft.
Mipahimangno usab si Marquez sa mga employer nga sa dili pa modawat og empleyado kinahanglan nga pangayuan og national police clearance aron masayran kung kini adunay record sa bisan unsang matang sa krimen.
Padayun ang imbestigasyon sa kapulisan kung ang maong suspek aduna bay kasab-wat gumikan sa pipila nga mudos sa pagpangawat.
Nanawagan usab ang hepe sa mga nabiktima sa maong suspek nga dili magduha-duha og duol sa Talamban Police Station aron mopasaka og kaso.
