CEBU CITY- Gi-postpone, sa Cebu City Council ang pag-release sa dugang nga P11 million alang sa financial assistance sa mga Senior Citizens sa dakbayan sa Sugbo niadtong Martes, Septeyembre 2, 2025.
Ang resolusyon, gipasiugdahan ni Konsehal Dave Tumulak, nga nagtinguha nga madugangan ang third-quarter budget sa Office of the Senior Citizens Affairs (OSCA) aron madugangan ang hinabang alang sa 92,000 ka mga benepisyaryo.
Una nang gipahibalo ni Mayor Nestor Archival nga ang mga senior citizen makadawat sa ilang tulo ka buwan nga lump sum payout sa ikatulong semana sa Septiyembre.
Apan atol sa deliberasyon, nagkasinabot ang konseho nga ipadaplin usa ang pag-aprobar niini ug tukion lamang sa umaabot regular session sa Septiyembre 10, aron sa pagpasabut sa City Budget Office ug OSCA.
Gipasabut usab sa konseho, aron nga tang-tangon usa sa mga barangay ang mga payroll sa mga namatay na nga benepisyaryo ug i-update ang listahan sa mga senior citizen aron sa pagsiguro nga ang mga kwalipikado magpabiling elgigible.
Samtang, gitahasan usab ang OSCA sa pagdumala sa pagberipikar uban ang barangay aron masiguro nga walay kakulian sa dili pa ang umaabot nga payout.
Sa pikas bahin, una nang nipasalig si Archival sa mga senior citizen nga makadawat gihapon sila sa ilang P3,000 nga lump sum sa ikatulong semana sa Septiyembre.
