Giapod-pud sa lokal nga kagamhanan sa dakbayan sa Mandaue ang mga libreng medisina alang sa mga nagkadaiyang barangay sa dakbayan.
Matud ni Mandaue City Mayor Jonkie Ouano, nga mobalur sa 11 Milyones ang ilang gipang-apud apod nga tambal alang sa 27 ka mga barangay sa ilang tagsa tagsa ka health centers.
Dugang usab sa Mayor nga aduna pay moabut nga 3rd batch sa mga ipanghatag nga tambal, lakip na niini ang anti-rabies vaccines.
Giklaro usab sa opisyal nga walay pinili sa mahatagan sa maong mga tambal gumikan alang kini sa tanan ug gihimug-atan nga adunay igong tambal alang sa matag barangay.
Sigon usab ni Ouano nga ilang gipost sa social media ang mga tambal nga gipanghatag aron usab mahibalo ang mga residente nga kung unsay mga tambal ang anaa sa ilang mga health centers.
Mokabat sa 25-milyones nga mga libreng tambal ang gipamalit sa lokal nga kagamhanan alang sa mga Mandauehanon.
