CENTRAL VISAYAS- Mokabat sa 447 ka indibidwal ang nadakpan sa tibuok Central Visayas gikan Mayo 24 hangtod 30, 2026, subay sa gipakusog nga operasyon batok sa kriminalidad sa Police Regional Office 7 (PRO7).
Subay sa gipagawas nga datus sa PRO7, ania ang detalyadong pagtuki sa malampusong serye sa mga operasyon sulod sa usa ka semana:
Sa Kampanya Batok Ilegal nga Droga, mokabat sa 192 ka personalidad ang nasikop, ug nakumpiska ang 1,816.26 gramos nga gidudahang shabu nga adunay Standard Drug Price (SDP) nga nagkantidad og PhP12,350,568.00.
Sa Manhunt Operations (Wanted Persons), nadakpan ang 120 ka wanted person, diin 22 niini giila nga Most Wanted Persons ug 98 ang gikonsiderar nga Other Wanted Persons.
Samnatng sa Illegal nga Sugal, nasikop ang 109 ka indibidwal ug nakasakmit og pusta nga nagkantidad og PhP15,295.00.
Sa Loose Firearms (Armas nga walay Papeles), nadakpan ang 26 ka malapason ug narekober ang 32 ka nagkadaiyang armas, usa ka explosive device, ug 115 ka buhing bala.
Gipasiugda ni PRO7 Acting Regional Director PBGEN Arnold E. Abad nga nagpabilin nga lig-on ang rehiyonal nga kapulisan sa ilang misyon nga wagtangon ang kriminalidad ug panalipdan ang kaayohan sa matag residente sa Central Visayas.
