CEBU CITY – Nasakmit ang usa ka kilong gibug-aton nga marijuana nga nagkantidad ug P120,000.00 gikan sa usa ka 43-anyos nga mag-uuma human sa gilusad nga buybust operation sa mga operatiba sa City Intelligence Unit sa Cebu City Police Office (CCPO) sa Brgy. Malubog dakbayan sa Sugbo kagahapon sa buntag.
Una niini, nalarot sa susamang operatiba ang 200 ka mga punuan sa marijuana sa Sitio Kamansili Brgy. Pangamihan, Dakbayan sa Toledo ug gisubay karon sa kapulisan ang pagkatawo ni alyas “Miguel” nga maoy responsable sa pagpatubo sa maong marijuana.
Subay niini, matud pa ni PLtCol. Randy Caballes ang hepe sa City Intelligence Unit sa Cebu City Police Office nga nasubay sa mga operatiba gikan sa usa ka informant nga matud pa si Joel Cabiles, residente sa Brgy Climaco ,Toledo City Cebu kinsang nasikop sa mga operatiba sa buybust operation, maoy tagakan sa mga naani nga tanom sa marijuana sa naasoyng plantasyon sa Toledo City hinungdan nga dali kining gi operate sa mga kapulisan.
Dugang pa ni PLtCol. Caballes nga ang nadakpan nga si Cabiles nidangop sa pagpamaligya ug marijuana gumikan usab sa kalisud ug mas dako ang kitaon niini sa illegal nga negosyo.
Panawagan niini nga kun adunay mga nahibal-an nga mga ilegal nga plantasyon sa marijuana mamahimong mosumbong sa kapulisan.
Nabalhog na karon sa prisohan si Cabiles ug mag-atubang ug kasong paghupot ug pagpamaligya og marijuana.// BRA, BEP
