Nasakmit sa kapolisan ang duha ka kilo nga gituohang shabu nga gibana-banang mobalor og P13.6 milyones gikan sa usa ka 38 anyos nga taga dakbayan sa Sugbo atol sa buy-bust operation nga gipahigayon niadtong Huwebes, Enero 26, 2023 sa Barangay Tayud, Lungsod sa Consolacion, amihanang Sugbo.
Ang suspek giila nga si Lunicito “Looney” Labitad, residente sa Barangay Quiot Pardo, dakbayan sa Sugbo.
Giila ni Police Major Reslyn Abella, ang tigpamaba sa Cebu Provincial Police Office, si Labitad nga nalista sa Unified PNP-PDEA Top 10 Regional Priority Target labot sa mga kalihokan sa ilegal nga drugas.
Ang pagkasikop ni Labitad sa Sityo Upper Bagacay, Barangay Tayud, gihimo human gi-validate sa kapulisan ang mga taho sa giingong kalambigitan niini sa illegal drug trade sa rehiyon.
Human sa validation sa mga taho, ang mga personahe sa intelligence ug drug enforcement units sa CPPO, pinangulohan ni Police Lieutenant Colonel Mark Lester Eteroza, nipahigayon sa transaksyon sa suspek ug malampusong nasikop mga alas 11:35 sa gabii.
Kasamtangang padayong gisukit-sukit sa kapolisan sa probinsiya ang suspek aron masuta kon aduna ba kini mga kauban ug diin gikan ang iyang ilegal nga drugas.
Sa pagkakaron anaa sa kustodiya sa CPPO si Labitad samtang nagpaabot sa pagpasaka og kasong illegal nga drugas batok kaniya.
