Gisusi sa mga kongresista ang P15.5 bilyones nga advance payment nga gihatag sa Philippine Health Insurance Corporation (PhilHealth) sa mga tambalanan ubos sa kontrobersyal nga Interim Reimbursement Mechanism (IRM) program.
Sa hearing sa House Committee on Appropriations karong Miyerkules, gitan-aw sa mga kongresista ang legalidad ug transparency sa IRM program, nga gipatuman sa Duterte administration.
Matod ni Gabriela Party-list Rep. Arlene Brosas adunay mga pasangil nga ang pundo nga gipagawas sa PhilHealth napunta lang sa mga bulsa sa mga kurakot nga opisyal.
Gisaway usab ni Brosas ang kapakyas sa representante sa PhilHealth sa pagtubag sa tanang pangutana kalabot sa programa nga gipatuman sa miaging administrasyon.
Ang IRM program gipatuman sa kataas sa COVID-19 pandemic.
Gikompirmar sa PhilHealth nga ang presidente ug CEO sa IRM implementer mao si Ricardo Morales, usa ka retired Army general.
Sa mosyon, gimanduan sa komite ang PhilHealth nga isumite ang mga dokumento nga may kalabotan sa IRM.
Gihangyo usab sa komite ang PhilHealth nga isumite ang mga ngalan sa mga opisyal nga nalambigit sa paghimo sa programa.
Ang komite nagpahigayon og mga pagdungog aron mahibaw-an kon giunsa paggasto sa mga ahensya ang pundo nga gigahin kanila sa Kongreso.
