CEBU CITY-Nigahin ang Cebu City Agriculture Department (CAD) og P160 milyones alang sa mga mag-uuma isip pagpangandam sa El Niño.
Kini ang gitino ni Cebu City Agriculturist Joelito Baclayon, nga ang bag-ong gisugyot nga budget gigahin alang sa agricultural aid ug protective culture sa mga mag-uuma.
Kini arun nga mapanalipdan ang kultura nga nagtumong sa pagpatunghag taas nga kalidad nga mga tanom, nga naglakip sa mixed cropping, rotation cropping, ug rain harvesting, ug uban pa.
Matod ni Baclayon, nga ang gisugyot nga budget gikonsiderar subay sa angay nga mga programa ug pasilidad alang sa mga mag-uuma, ilabi na sa mga partikular nga lugar nga nagkinahanglan og dakong tabang.
Dugang pa, nga 30 na ka bukirang barangay ang na-cluster, diin narehistro ang mga mag-uuma aron dali silang mailhan atol sa gahin sa hinabang.
Matod niya nga ila usab nga gipaila-ila sa mga mag-uuma ang open-pollinated variety (OPV) sa mga tanom nga mahimong molambo panahon sa grabeng kainit, ug gitudloan sila sa pagpraktis sa drip irrigation aron makadaginot sa tubig.
Giawhag ni Baclayon ang mga mag-uuma sa pagsagop sa lain-laing alternatibong tinubdan sa pagkaon, ug dili lang magsalig sa bugas.
Gihatagan usab ang mga mag-uuma og satellite markets diin sila makadisplay ug makabaligya sa ilang mga produkto direkta ngadto sa mga konsumidor.
