Nasikop ang 22-anyos nga babaye pinaagi sa hiniusang anti-drug operation nga gipahigayon sa City Intelligence Unit/City Drug Enforcement Unit sa Mandaue City Police Office inubanan sa Philippine Drug Enforcement Agency Region-7 sa Uniwide, Brgy. Tipolo, dakbayan sa Mandaue gabii Enero 15, 2025.
Nakuhaan kini og 2.5 nga kilo sa gituohang shbau nga adunay gibana-banang kantidad nga P17 milyones.
Giila ang suspek nga si Perlyn Rose Alferez, taga Sitio San Roque, Lorega San Miguel, ning dakbayan sa Sugbo.
Samtang, walo ka mga indibidwal ang napusasan diin duha niini kay mga barangay worker ug ang usa kay kanhi police sa managlahing buy bust operation sa dakbayan sa Sugbo ug Dumaguete Negros Oriental sa samang adlaw.
Gilusad ang unang operation sa Purok Israel Barangay Daro dakbayan sa Dumaguete Negros Oriental sa buntag nga miresulta sa pagka-sikop sa lima ka mga tawo.
Diin nasakmit sa mga operatiba ang walo ka pakete sa gituohang ilegal nga drugas nga motimbang sa 6 gramos nga gibana-banang mobalor og P40,800.00 lakip na ang buy bust money ug mga ‘drug paraphernalia’.
Ug sa hapon niini, kay gi-ronda sa mga sakop sa PDEA-7 uban sa Mambaling Police Station nga nahimutang sa C. Padilla, Barangay Duljo Fatima nga miresulta sa pagka-sikop sa tulo ka mga tawo apil na niini ang usa ka kanhi pulis sa probinsya sa Sugbo.
