Nasakmit ang 2.5 kilo o gibana-banang mobalor og P17 milyones nga kantidad sa gituohang shabu gikan sa usa ka babaye sa Barangay Subangdaku, dakbayan sa Mandaue gabii, Agosto 22.
Ang malampusong pagkadakop sa babaye tungod sa hiniusang anti-drug operation nga gipahigayon sa City Intelligence Unit/City Drug Enforcement Unit sa Mandaue City Police Office, Regional Police Drug Enforcement Unit 7, Special Operations Unit 7, PNP DEG ug Philippine Drug Enforcement Agency 7.
Giila ang dinakpan nga si “Mary Jane”, 37-anyos taga Barangay Sawang, dakbayan sa Sugbo.
Basi sa impormasyon gikan sa suspek nga mao kini ang ika-walo ka higayon nga igo lang kining gisugo nga ihatod ang mga gidiling drogas.
Ingon man nga mao kini ang unang higayon nga gisugo ang suspek sa dakbayan sa Mandaue ug wala swertiha gumikan nadakpan.
