CEBU – Mukabat sa kapin P194 million nga kantidad sa nagkadaiyang klasi sa iligal nga drogas ang gisunog sa PDEA 7 gamit ang usa ka incinerator sa APO Cement Corporation sa Barangay Tinaan, dakbayan sa Naga.
Gilangkuban ang mga nahisgutang ginadiling drogas sa mga shabu nga nagkantidad ug kapin P58 million pesos, ampoules nga kapin P139,000, marijuana nga mukabat sa kapin P6 million ug cocaine nga nagkantidad ug kapin P5 million.
Sa pakighinabi sa Bombo Radyo Cebu kang Atty. Clarence Paul Oaminal, ang kanhi Dangerous Drugs Board Undersecretary ug karun Cebu Province Anti-Illegal Drug Coordinator, gibutyag niini nga ang mga nahisgutang iligal nga drogas ang nasakmit sa PDEA 7 ug PNP dinhi lang sa Cebu City ug Cebu Province, ug wala pa malakip ang mga ginadiling drogas sa uban pang lugar sa Rehiyon 7.
Gihimug-atan ni Atty. Oaminal nga magpadayon ang pagsunog sa mga iligal nga drogas ug dili kung kanus-a lang kini gusto nga gub-on sa mga otoridad.
Kahinumdoman nga una nang gipanawagan sa kanhi kongresista ug main author sa Republic Act 9165 o ang Comprehensive Dangerous Drugs Act of 2002, ug karun Cebu City Councilor Antonio ‘Tony’ Cuenco, nga sundon sa PDEA ug PNP ang kung unsa man ang nakalatid sa balaud sa ‘disposal’ sa nasakmit nila nga mga iligal nga drogas.
Sa maong pamaagi giingong mawagtang ang pagduda sa publiko nga gi-recycle lang sa mga otoridad ang mga ginadiling drogas nga ilahang nasakmit sa matag anti-illegal drug operation.
