CEBU CITY– Napaglantawan ni Cebu City Councilor Jerry Guardo nga posibleng gi-unhan lang sa mga kritiko ang giingong pag-purchase sa City Government og tuob kits nga mibalor og P2.5-million.
Kini human nga gitataw sa pangagamhanan sa dakbayan, pinaagi ni City Legal Officer Rey Gealon, nga wala gipalit ang 1,000 ka mga steam inhalation kits gamit ang pondo sa gobyerno, inay donation lang gikan sa anonymous supplier.
Sigon pa ni Guardo sa dighang nahinabi sa Bombo Radyo Cebu sa tulumanong Bombohanay sa Udto nga gitubag na ni Mayor Edgardo Labella ang maong isyu sanglit kutob lang kini sa legislation.
Dugang pa nga pagtataw sa konsehal nga igo lang kining niduso og resolusyon ug ni-endorso sa paggamit sa tuob isip alternatibong medisina batok sa COVID-19.
Wala nay angayang palapdan, matud pa, ang maong isyu sanglit nahatagan na og katin-awan pinaagi sa executive department.
Mipadayag usab si Guardo nga magdepende lang sa publiko kung tumanon ba ang pagtuob o dili. |GN
