PROVINCE OF CEBU-Gilusad sa Kagamhanan sa Probinsiya sa Sugbo ang “Sugbo Merkadong Barato” (SMB) niadtong Martes, Nobyembre 28, 2023, sa Talisay City Hall, diin ang mga kabus nga Sugbuanon makapalit na og bugas sa tag P20 matag kilo.
Ang kagamhanan sa probinsiya nigahin og P100 milyones aron ipalit og 80,000 ka sako sa bugas gikan sa National Food Authority (NFA), nga ibaligya sa mga kwalipikadong benepisyaryo.
Dugang P100 milyones ang gamiton sa pagpalit og commercial rice.
Subay sa programa, nagtanyag usab ang Kapitolyo og mga utanon, seafood, processed food ug non-food items gikan sa gagmay ug medium-sized nga negosyo sa tanang local government units (LGUs) sa tibuok probinsiya gikan sa Lunes hangtod sa Biyernes.
Tugutan nga makapalit sa gi-subsidize nga bugas ang mga kabus nga pamilya ug ilahang madawat ang mga QR code ID card aron masubay ang ilang nangaging mga gipamalit.
Ingon man nga gitugotan lang ang mga benepisyaryo nga makapalit ug lima ka kilo nga bugas matag semana.
Matod ni Cebu Gobernador Gwendolyn Garcia, ang proyekto dili magdala og kuwarta alang sa probinsiya.
