Ang pagbaligya sa P20 matag kilo nga bugas humay sa mga Kadiwa stores sa Metro Manila ug silingang probinsya magsugod karong umaabot Mayo 13, usa ka adlaw human sa midterm elections.
Matod ni Department of Agriculture (DA) Secretary Francisco Tiu Laurel Jr., nga sama sa gisaad, magpadayon ang pagbaligya sa baratong bugas human sa eleksiyon.
Gipasabot sa kalihim nga temporaryong gi-postpone ang pagbaligya sa baratong bugas agig tubag sa 10-day spending ban sugod niadtong Mayo 2.
Ang nasangpit nga programa unang gilusad sa dakbayan sa Sugbo niadtong sayong bahin sa Mayo ug unang gitakda alang sa unom ka buwan nga pilot implementasyon sa Kabisay-an.
Bisan tuod nga ang programa sa sinugdanan nakatutok sa Kabisay-an, ang kadagkoan sa DA miingon nga mahimo kining palapdan ngadto sa ubang mga rehiyon apil na ang Metro Manila ug mga silingang probinsiya pinaagi sa KADIWA centers ug mga lokal nga kagamhanan nga nalakip sa national food crisis emergency initiative.
Lakip sa makapalit og baratong bugas mao ang mga vulnerable groups sama sa solo parents, persons with disabilities, senior citizens ug 4Ps members.
Mokabat sa 2 milyones ka panimalay o 10 milyones ka Pilipino ang gilauman nga makabenepisyo sa maong programa, nga molungtad hangtod sa Disyembre sa tumong nga mahatagan ug barato ug maayong kalidad nga bugas sa labing nanginahanglan.
