CEBU-Nagsugod na sa pagpamaligya sa tag P20 nga kilo sa bugas ang pipila ka mga Local Government Units (LGUs) sa lalawigan sa Sugbo subay sa inisyatiba sa Department of Agriculture (DA) ug Cebu Provincial Government.
Sa lungsod sa Daanbantayan sa amihanang bahin sa probinsya kay nagsugod sa maong pagpamaligya kagahapong adlawa Lunes, Abril 28, 2025.
Gisunod gihapon niini ang programa sa Kapitolyo sa Sugbo nga Sugbo Merkadong Barato (SMB) nga unang gilusad niadtong Nobyembre 2023.
Samtang sa pikas bahin, ang pinaka-habagatang lungsod sa Santander kay magsugod karong adlawa sa maong programa sa samang presyo nga adunay limitasyon sa 10 kilos sa bugas kada balay matag semana.
Mahimo ra kining makapalit sulod sa naka-schedule nga oras sa matag barangay sa maong lungsod nga maoy gipahibalo sa Municipal Agriculture Office niini.
Mag-una ang Sugbo sa maong programa sa tibuok Kabisay-an tungod kay aduna na kiniy daan logistical network pinaagi sa SMB program nga adunay iluwat nga QR-coded cards itunol sa mga napiliang konstituwente sa maong lungsod subay kini sa inisyatiba sa kasamtangang administrasyon Marcos Jr.
Gani ang DA ug National Food Authority (NFA) kay nipahibalo nga magsugod sa Mayo 1 ang paglusad sa programa niini diin aduna nay naka reposition nga 600,000 ka mga sako sa bugas ang ihatod sa lalawigan isip pilot phase sa programa.
Musunod sa umaabot semana ang ubang lalawigan sa Visayas kung sa higayon maka-mobilize na kini sa ilang mga sakop.
