CEBU CITY — Moabot sa kapin P23-million nga kantidad sa ginadiling drugas ang nahipos sa mga sakop sa PNP human sa sagunson nga mga buybust operation sa Sugbo.
Nasakmit ang kapin P7-milyones ka pesos ang balor sa shabu gikan sa usa ka high value target atol sa buybust operation nga gipahigayon sa Guadalupe PNP sa may Sitio Lumbane, Brgy. Guadalupe, dakbayan sa Sugbo.
Naila ang dinakpan nga si Mayla Delumar, 29 anyos walay trabaho ug residente sa maong dapit apan basi sa surviellance lumad kini nga taga Pasil.
Matud ni Police Major Dindo Alaras ang hepe sa Guadalupe PS nga mitumaw ang pangalan ni alyas “Maymay” sa ilang mga follow up operation.
Nakuha gikan niini ang usa ka kilong shabu nga dunay DDB value nga P7,032,200
Gitino ni Alaras nga duna na silay mga personality kung diin gikan ang maong mga shabu apan dili pa kini nila pwede nga i-disclose sanglit duna pa silay mga follow up operation.
Samtang laing shabu ang nasakmit sa hiniusang operasyon sa Central Intelligence Branch (CIB), Mandaue City Police Office (MCPO), Drug Enforcement Group (DEG), ug Cebu City Police Office sa may Sitio Mahusay Brgy. Subangdaku, dakbayan sa Mandaue.
Sikop ang high value target nga si Vicente Deloy Dungog Jr. aka “Bentoy” 32 anyos ug lumulopyo sa Sitio Lumbane, Brgy. Guadalupe, dakbayan sa Sugbo.
Nakuha gikan niini ang 1 ka medium sized pack nga gitoohang shabu, 1 ka large pack, ug 2 ka extra large nga putos kung diin mitimbang kini og 2 kilos ug dunay DDB value nga P14,650,000 pesos.
Nakuhaan usab ang usa ka kanhi waiter og P1.7 million nga kantidad sa shabu atol sa laing buybust operation nga gipahigayon sa Sitio San Vicente, Brgy. Duljo Fatima, sa susamang dakbayan.
Giila ang dinakpan nga si Nelson Booc, 33 anyos, ug residente sa nahisgutang lugar.
Nabalhog na sa prisohan ang naasoy nga mga subject ug mag-atubang og kasong kalapasan sa Comprehensive Dangerous Drugs Act (RA 9165). (With reports by Bombo Lahvi Quiñones/GN)
