Gibutyag ni President Ferdinand ”Bongbong” Marcos Jr., nga na-alkanse ang Pilipinas og P3 billion tungod sa agricultural smuggling sa nasud sa miaging tuig.
Mao kini ang pamahayag ni Marcos atol sa pagpirma niini sa Anti-Agricultural Economic Sabotage Act aron hingpit na kining mahimong balaud.
Matud sa presidenti nga ang agri smuggling dili lang economic sabotage sa agricultural sector apan giingong bahad usab kini sa national security ug ekonomiya sa nasud.
Giingong napanamastamasan usab niini ang panginabuhian sa mga mag-uuma ug mananagat sa nasud ingon man hulga kini sa food sustainability sa Pilipinas.
Apan gipanghambong ni President Marcos nga ubos sa iyang administrasyon, sulod sa walo ka buwan karong tuiga, nasakmit sa mga otoridad ang kapin P230 million nga balor sa smuggled agricultural products.
Gitumbok ni Marcos nga ubos sa bag-ong balaud, ang smuggling, hoarding, profiteering, ug cartel operations sa agricultural and fishery products maisip na nga economic sabotage, non-bailable offense kini diin mabilanggo og life imprisonment ug multa nga five times sa balor sa nasakmit ang ipahamtang sa mga masakpan.
Gidugang usab sa presidenti nga target sa maong balaud dili lang ang mga mastermind sa naasoyng illegal nga kalihukan apan giingong lakip na usab niini ang mga kakunsabo, mga financiers, brokers, trabahanti ug bisan ang mga transporters.
