CEBU CITY – Mokabat sa P3 milyones ang kantidad sa nasakmit nga shabu atol sa gipahigayon nga buy bust operation sa han-ay sa Cebu Provincial Police Office sa Provincial Intelligence Branch (CCPO- PIB- 7) sa Sitio Banawa, Brgy. Guadalupe, dakbayan sa Sugbo.
Giila ang subject sa operasyon nga si Stephen Ceniza, 39-anyos, minyo, lumad nga taga Sitio Lawis, Brgy Pasil, Dakbayan sa Sugbo ug kasamtangan nga nagpuyo sa usa ka condominium sa Banawa ning dakbayan.
Nakuha sa kapolisan gikan ni Ceniza ang napulo ka medium-sized nga pakete sa shabu ug gibana-bana’ng mobalor kini kapin sa usa ka milyon.
Tanggong na sa prisohan si Ceniza ug gikatakdang pasakaan og kasong kalapasan sa RA 9165 kon Comprehensive Dangerous Drugs Act.
Samtang, sa lain usab nga follow-up nga anti-drug operation sa kapolisan Brgy. Ermita ni’ng dakbayan, napusilan si John Bruce Gabison residente sa Sitio Lawis Brgy. Pasil, dakbayan sa Sugbo.
Nakuha gikan sa posisyon niini ang duha ka dagko’ng pakete sa shabu diin gibana-bana’ng mobalor kini sa dul-an P3 milyon.
Kasamtangan nga nalandig sa tambalanan si Gabison gumikan kay naka-angkon kinig samad pinusilan sa dapi-dapi nga bahin sa iyang lawas diin nisukol usab kini atol sa gipahigayon nga operasyon.
