CEBU CITY – Natanggong sa prisuhan ang 2 ka mga dinakpan, lakip na ang usa ka senior citizen, human nakuhaan og dul-an P5-milyones nga balor sa ginadiling drugas atol sa gipahigayon nga buybust operation sa Brgy. Labangon.
Giila ang mga dinakpan nga silang Dolores “Inday” Suchiza, 38 anyos; ug Lolita Mosqueda, 64 anyos, ug parehong nagpuyo sa Brgy. Calamba sa susamang dakbayan.
Matud sa deputy chief sa Carbon Police Station nga si Lieutenant Colonel Glenn Gonzales nga myembro silang “Inday” ug Mosqueda sa usa ka bigtime drug group nga nag-operate sa dakbayan sa Sugbo.
Nakuhaan ang mga dinakpan og 700 gramos nga white crystalline shabu ug mikantidad kini og P4,760,000.
Anaa karon silang Suchiza ug Mosqueda sa Fuente Police Station lock up cell ug gikatakda kining pasakaan og kasong kalapasan sa Section 5, Article 2 sa RA 9165 o Comprehensive Dangerous Drugs Act.
