CEBU CITY — Nabalhog sa prisuhan ang gituohang duha ka mga marijuana planters human gilarot sa mga sakop sa PNP ang mga marijuana plants nga nagkantidad og kapin P4-million sa Brgy. Langosig, Danao City, Cebu.
Gisikop sa mga sakop sa Danao City PNP ang mga mananomay nga silang Jolito Landero, 39 anyos; ug si Renerio Cal, 49 anyos.
Samtang gipangita sa kapulisan ang laing mga suspek nga silang Isidro Martel ug Apolicronio Lawas Jr. human miikyas atol sa pagpanglarot.
Matud ni Police Lieutenant Colonel Maribel Getigan, ang hepe sa Danao City PNP, dugay-dugay nang gipaubos sa surveillance ang plantasyon sa marijuana sa maong lugar hinungdan nga mipahigayon sila sa maong operasyon.
Nasakmit sa kapulisan ang 10,000 ka mga fully-grown nga tanom sa marijuana nga nagkantidad og 4.2-million pesos, ingon man mga gamit sa pagpananom.
Atol sa pagkasikop sa duha, kalit lang nga misukol ang asawa sa usa sa mga dinakpan nga si Gina Cal ngadto sa usa ka police officer.
Matud usab ni Getigan nga gikawras ni Cal ang nawong sa police officer ug gitulod sa tinguha nga maluwas ang iyang bana sa pagkasikop.
Mag-atubang ang mga mananomay og kasong kalapasan sa Sections 11 ug 16 sa Republic Act 9165 o Comprehensive Dangerous Drugs Act samtang pasakaan usab ang asawa og kasong Direct Assault ug Obstruction of Justice.
Gisunog sa mga kapulisan ang mga gipanglarot nga marijuana stalks samtang gihipos ang pipila niini isip mga ebidensya.
