CEBU CITY — Padayon nga gisuta sa mga otoridad sa probinsiya sa Bohol ang posibleng mga kauban pa sa mga suspetsado nga nadakpan atol sa buy bust operation nga nisangpot sa pagka sakmit sa gituhu-ang shabu nga mobalor sa gibana-banaang P40-milyunes.
Kahinumduman nga pina-agi sa hini-usang operasyon nga gilusad sa Bohol PNP og Philippine Drug Enforcement Agency (PDEA) natigayon ang buybust operation sa managlahing lugar sa Sitio Antipolo, Brgy. Dampas, dakbayan sa Tagbilaran ingon man sa Talibon Bohol.
Sikop ang mga suspetsado nga maoy gitudlong nagbaligya sa mga gituhuang ginadiling drogas nga nakasulod pa sa Chinese tea bag ang uban niini.
Giila ang mga dinakpan nga silang Lelit Sinugbojan taga Saac 1, Buaya, Lapu Lapu City; Chello Mae residente sa Kawayan, Inabanga, Bohol; Jenelyn Matura residente sa Bingag, Dauis, Bohol; Humprey Cenabre taga Liloan Norte, Inabanga, Bohol; ug Jaime Dajao taga Purok- 2 Brgy. Tanghaligi, Talibon, Bohol.
Nagtingkagol na sa bilangguan ang mga suspetsado og nag-atubang na og kaso nga kalapasan sa Republic Act 9165 o Comprehensive Dangerous Drugs Act.
