Nag-apelar sa paghatag ug dugang health incentives sa mga mabdos ang grupong Malusog sa Matalinong Bata Coalition.
Kini aron masuportahan ang mga masuso sa ilang sabakan, apil na ang mga bata gikan sa pagkahimugso hangtod sa edad nga duha ka tuig.
Nihimo ang grupo sa maong panawagan tungod sa giingong isyu diin 1 sa tulo ka mga batang Pinoy ang dili igo ang pagdako.
Matod sa co-convenor sa grupo nga si Lyonel Tanganco, ilang gihangyo ang gobyerno nga hatagan og dugang P400 nga insentibo matag buwan ang mga mabdos, o katumbas sa P13 matag adlaw.
Kining P13 matag adlaw giingong igo na nga ikapalit og usa ka itlog alang sa inahan ug sa iyang anak.
Nanghinaot ang grupo nga mahatag ang maong hangyo ilabi na nga padayong nisaka ang gidaghanon sa mga mabdos dinhi sa Pilipinas.
