Nagsugod na ang mga tindahan sa Kadiwa sa Department of Agriculture sa pagpamaligya og mas baratong bugas sa tag P43 matag kilo.
Mas ubos kini og P2 sa inisyal nga presyo nga P45 matag kilo sa bugas nga gibaligya ubos sa Rice for All Program.
Matod ni DA Secretary Francisco Tiu Laurel Jr., nalipay siya sa mainitong pagdawat sa publiko sa programa sa gobyerno ug giklaro usab sa kalihim nga dili mopagawas og kuwarta ang ahensya aron ma-subsidize ang bugas tungod kay ang aktuwal nga presyo gikan sa mga mag-uuma direktang gibaligya sa mga konsumidor.
Gitataw usab sa kadagkoan sa DA nga dili lump sum ang tag P43 matag kilo nga bugas ug dili mawad-an og kuwarta ang gobyerno ug Kadiwa niini.
Nanghinaot ang kalihim nga magpadayon ang maong programa tungod kay matod niya aduna pay igong suplay sa bugas nga ibaligya hangtod sa Pebrero sa sunod tuig.
Samtang, bisan og walay limit ang pagpalit og tag P43 matag kilo sa bugas, ang kalihim ni-apelar sa publiko nga mopalit lang og igo alang sa konsumo sa ilang pamilya ug dili kini himuong negosyo.
