Giaprobahan sa House of Representatives sa ikatulo ug katapusang pagbasa ang gisugyot nga P6.79-trillion 2026 national budget (House Bill 4058) niadtong Lunes, Oktubre 13.
Nakadawat kini og 287 ka boto pabor, 12 batok, ug 2 abstention human sa deliberasyon sukad niadtong Agosto 18.
Matod ni Speaker Faustino “Bojie” Dy III, ang pagpalabang sa budget maoy pamatuod sa pagtutok sa Kongreso sa reporma ug tulubagon.
Samtang ang edukasyon, panglawas, agrikultura, ug serbisyong katilingbanon maoy prayoridad sa budget subay sa adbokasiya ni Presidente Ferdinand Marcos Jr.
Subay niini, nanawagan si Speaker Dy sa mga magbabalaod nga siguruhon ang matinud-anon ug tukma nga paggamit sa pundo sa publiko.
Sa pikas bahin, gawas sa nasudnong budget, giaprobahan usab sa Kamara ang pipila ka importanteng balaudnon sama sa HB 4746 (Franchise for Bohol Light Company, Inc.); HB 4757 (Sustainable Cities and Communities Act); HB 4745 (Last Mile Schools Act; HB 4744 (Private Basic Education Vouchers Assistance Act).
Samtang, si House Appropriations Chair Rep. Mikaela Suansing mipasalig nga ang 2026 national budget maoy tubag sa tinuod nga panginahanglan sa katawhang Pilipino, diin ang P1.28 trilyon ang gigahin alang sa edukasyon, ang kinadak-an sa kasaysayan, nga milabaw sa 4% nga global benchmark, ug naglakip kini sa mga pondo alang sa libreng kolehiyo ubos sa Universal Access to Quality Tertiary Education Act.
Adunay P411.2 bilyones usab alang sa panglawas, lakip ang P113B sa PhilHealth ug P49B alang sa zero-balance billing program alang sa mga kabus.
Laing P292.9 bilyones alang sa agrikultura, apil ang P10B nga ayuda para sa mga mag-uuma ug mangingisda, P74.5B para sa farm-to-market roads ug irigasyon, ug P30B para sa makinarya.
Dugang pa, ang dugang pundo gikan sa P255B nga flood control projects nga giwagtang, ug matod ni Suansing, wala nay mga proyektong pang-imprastraktura nga mapundohan gikan sa mga unprogrammed appropriations gawas lang kon dunay dugang kita ang gobyerno.
Gipahinumdoman usab niya nga ang unprogrammed appropriations dili kabahin sa nasudnong budget ug dili kini awtomatik nga mapundohan, ug midugang nga ang proseso sa budget deliberation nahimong mas bukas ug matinud-anon pinaagi sa pagwagtang sa gamay nga komite, pag-apil sa civil society groups, ug pagsunod sa constitutional process sa pag-amendar sa dili pa ang ikaduhang pagbasa.
