Aprobado na sa House of Representatives ang gisugyot nga 2026 national budget sa ikatulo ug ulahing pagbasa niini niadtong Lunes, Oktubre 14 diin kapin sa P200-bilyones ang “unprogrammed appropriations” (UA) ang nalakip.
Atol sa House plenary session, 287 ka mga representantes ang mibotar pabor sa 2026 House General Appropriations Bill, 12 ang mibabag, ug duha mi-abstain.
Pipila sa mga wala mibotar pabor kay sila ML Partylist Rep. Leila De Lima, Akbayan Partylist Rep. Chel Diokno, ug Gabriela Partylist Rep. Sarah Elago nga nanghinaot nga matangtang ang unprogrammed appropriations diin mao kini ang tinubdan sa kwestiyonableng mga flood control projects.
Apan sa pikas bahin, gidepensahan ni House Committee on Appropriations Chairperson Rep. Mikaela Suansing ang pagpabilin sa unprogrammed appropriations nga matod pa nga ang mga locally funded infrastructure projects kay natangtang na aron malikayan ang posibleng pagpangabusar.
Gipasalig pud niini nga dili na maabusaran sa pagpanglimbog ang unprogrammed funds sukwahi sa mga nahitabo kaniadto.
