PROVINCE OF BOHOL-Nasikop sa Dauis Municipal Police Station sa Bohol Police Provincial Office (BPPO) sa pakigtambayayong sa Provincial Intelligence Unit-Bohol ang usa ka babayeng big-time drug dealer nga nalambigit sa ilegal nga kalihukan sa drugas sa Dauis, Bohol.
Giila ang nasikop sa mga operatiba nga usa ka 56-anyos nga drug suspect gikan sa probinsiya sa Leyte kinsa nakuhaan og P7.1 milyones nga balor sa ilegal nga drugas sa drug bust operation sa Purok 2, Brgy. Poblacion, Dauis, Bohol alas 10:55 sa gabii sa Marso 27, 2024.
Gitino ni PBGEN Anthony A Aberin, PRO7 Regional Director, nga ang pagkasikop naggumikan sa mga taho nga gihatag sa komunidad ngadto sa mga otoridad nga misangpot sa dinaliang pagkasikop niini nga adunay kapin sa 1 ka kilo sa ilegal nga drugas ug uban pang drug paraphernalia nga nakumpiska.
Dugang pa sa opisyal, nga magpabilin silang komitado sa pagputol sa suplay sa ilegal nga drugas sa Central Visayas agig hugot nga pagsunod sa BIDA Program ni SILG Atty. Benjamin Abalos Jr., ug PNP’s 5-Focused Agenda”.
Kasong paglapas sa R.A 9165 o Comprehensive Dangerous Drugs Act of 2002 ang pasakaan sa suspek samtang ang mga nakumpiska nga ebidensya isumiter sa Bohol Provincial Forensic Unit alang sa eksaminasyon ug disposisyon.
