CEBU – Gisulayan sa kapolisan nga mailhan ang nagtanom sa 19, 500 ka punoan sa mga punoan sa marijuana nga ilang giibot sa Sitio Song-on, Barangay Lusaran, dakbayan sa Sugbo pasado alas 11 sa hapon niadtong Sabado, Oktubre 15, 2022.
Kini ang gibutyag ni Police Lieutenant Colonel Dexter Calacar, commander sa Cebu City Mobile Force Company, nga nagpahigayon sila og ronda sa kapolisan dihang usa ka nagpakabana nga tawo ang nipahibawo kanila sa presensya sa mga tanom nga marijuana sa titip nga dapit sa Sitio Song-on.
Matod niya, niabot og usa ka oras ug tunga una sila nakaabot sa lugar, kung diin mitabok pa sila og suba.
Dugang pa, nga ang giibot nga mga tanom nga marijuana nagkantidad og di mominos P7.8 milyones.
Apan napakyas sila sa pagdakop sa nagtanom niini, gumikan kay walay tawo sa ilang pag-abot sa dapit.
Matod ni Calacar nga tungod sa kalayuon niini sa main road nakahukom sila nga sunugon dayon ang mga gipang-ibot nga mga tanom nga marijuana, ug nigahin laamng sila ug unom ka fully-grown plants para i-turnover sa Cebu City Forensic Unit alang sa eksaminasyon ug chemical analysis.
