CEBU CITY — Sikop ang usa ka gituohang mananomay og marijuana human gilarot sa mga sakop sa PNP ug PDEA ang P8-million nga kantidad sa mga tanom niini kagahapon sa Brgy. Pangamihan, Toledo City, Cebu.
Base sa impormasyon gikan sa PDEA-7, giila ang dinakpan nga si Jennelyn C. Cabiles, samtang gipangita pa silang Eduardo A. Cabiles, Argie Cabiles, ug Diovenal A. Cabiles.
Naibot ug gisunog sa otoridad ang 6,500 ka mga marijuana plants nga mikantidad sa maong balor sa maong plantasyon sa Sitio Luctugan.
Nasakmit usab sa kapulisan ang duha ka kalibre 45 nga pistola nga adunay duha ka magasin ug 12 ka buhing mga bala, usa ka kalibre 38 nga revolver, usa ka KG-8 nga armas, ug duha ka mga granada.
Gawas sa kasong kalapasan sa Comprehensive Dangerous Drugs Act, mag-atubang ang mga dinakpan og illegal possession of fire arms.
