Dismayado si Talisay City Mayor Gerald Anthony “Samsam” Gullas sa Metropolitan Cebu Water District (MCWD) human nga wala mahinayon ang gitakda nilang meeting.
Kini subay na sa nasinating kanihit sa suplay sa tubig sa mga nanimuyo sa maong syudad.
Matud ni Gullas nga na-schedule na daan ang ilang meeting kauban sa mga nangulo sa MCWD, kauban ang mga sakop sa bag-ong naumol nga Talisay Water Management Council.
Kini aron hisgutan ang mga problema sa suplay sa tubig aron mahatagan og igo nga kasulbaran.
Gihulagway ni Gullas nga “paasa” ang MCWD gumikan kay uwahi niyang nahibaw-an nga nagbakasyon sa Japan ug Singapore ang pipila ka mga opisyal sa water district.
“Kung maayo mopaasa si crush, layo ra gyud si crush mo paasa ni MCWD. Nisaad og 2pm meeting to address real problems of the city. Pero nang Indyan man!! Kinsay ka relate???” saysay pa sa post ni Gullas.
Tungod niini, gitugyan ni Gullas ang maong problema sa City Legal Office aron tan-awon ang mga anggulo kalabot na sa suplay sa tubig.
Nakapangutana si Gullas kung aduna bay “professional courtesy” ang mga opisyal sa MCWD.
Usa sa mga apektado sa kanihit sa suplay sa tubig mao ang Jaclupan Dam nga nahimutang sa dakbayan sa Talisay.
