CEBU CITY — Gidala sa mga sakop sa PADS Dragonboat Racing Team ang garbo sa pagka-Cebuano alang sa ilang pagpakigsangka sa 14th International Dragon Boat Federation (IDBF) World Nations Championships sa Thailand.
Sa pagpakighinabi sa Bombo Radyo kang JP Ecarma Maunes, ang team manager ug founder sa Philippine Accessible Disability Services, Inc. (PADS), kini nagkanayon nga usa ka dakong garbo ang pagrepresentar sa paradragonboat racing team sa Pilipinas diin pulos kini mga persons with disabilities.
Gitataw ni Maunes nga walay giilang disability ang pagbugsay sa dragonboat basta ipakita lang ang sa tanan ang panaghiusa ug maayong performance.
Dugang pa niini nga gipaubos sa subsob ug world-class nga training ang mga sakop sa PADS dragonboat racing team aron pamatud-an nga kaya silang makigsangka sa mga abled-body teams.
Nasayran nga pulos taga-Cebu ang mga myembro sa paradragonboat team nga maoy modala sa bandera sa nasud kauban ang 200 ka mga atleta sa Philippine Dragonboat Federation Team.
Ipahigayon ang IDBF World Nations Championships karong Agosto 20 ngadto sa 25 sa Pattaya, Thailand.
Magtapok sa maong dragonboat competition ang 4,000 ka mga atleta gikan sa 30 ka mga nasud lakip na ang Pilipinas.
