CEBU-Luyo sa mga kadaugan sa Philippine Accessible Disability Services Inc. (PADS) Dragon Boat Team nga nagdala og dungog sa Pilipinas, ilabi na sa mga world championships, nagpahipi sa gihapon ang ilahang problema sa pinansyal nga aspeto.
Sa pakighinabi sa Bombo Radyo Cebu kang John Paul ‘JP’ Maunes, ang founder ug team manager sa PADS, gisaysay niini ang ilahang kalisod nga nahi-aguman sa bag-o lang natapos nga International Dragon Boat Federation (IDBF) World Dragon Boat Racing Championships sa Pattaya, Thailand.
Gibutyag ni Maunes nga pila na lang kaadlaw sa wala pa ang ilahang kompetisyon, ning ahat na lang sila sa pagpalit og plane ticket paingon sa Thailand gikan sa ilahang kaugalingon nga paningkamot gumikan kay wala’y naabot nga suporta, kansang una nang gisaad alang kanila.
Matud pa, inutang ang tanan nilang budget alang sa naasoy nga kompetisyon, diin migasto ang matag paddler og P80,000, giingong kantidad nga dili lalim pangita-on.
Gidugang pa niini, sa ikatulo nga adlaw gikan sa ilahang pag-abot sa Thailand, diriyot pa sila nga gipapahawa sa gipuy-an nga hotel gumikan gipaninglan na sila sa ilahang bayad, butang nga nagpa-low morale sa grupo.
Ang bus nga gisakyan sa PADS kay samang mini bus o party bus, butang nga giingong gikataw-an sa ubang grupo gikan sa mga dagkong nasud nga nagsakay og ‘de aircon’ nga bus.
Nagkanayon si Maunes nga naglaum sila nga makakuha na og suporta gikan sa mga local government units ug national agencies gumikan ikatulo na kini nga world championship nga ilahang gisalmotan nga naghatag og dungog sa Pilipinas, apan giingong wala sila’y nakuha nga suporta.
Bisan pa man niini, mapasalamaton kini sa tanang mga Filipino ug mga langyaw nga volunteers nga mitabang kanila, ingon man sa Filipino community sa Thailand nga nagpakaon sa grupo, diin ilaha gayud kini nga gidayeg.
Kahinumdoman nga nalangkat sa Philippine Paradragon Team ang kinatibuk-ang 6 ka gold, 5 ka silver ug 8 ka bronze medals samtang ang premiere team gikan sa Philippine Dragon Boat Federation midugang og 3 ka bronze sa 16th IDBF World Championships sa Pattaya, Thailand.
