Cebu City-Nanawagan ug tabang ngado ni Presidente Rodrigo Duterte ang asawa sa Philippines Airforce Member nga si Staff Sgt. Mark Herber Oberes kinsang gisunog patay sulod sa iyang sakyanan sa may Carcar City niadtong Pebrero 1.
Kini human nga gihatud na sa katapusang pahulayan ang PAF member karong adlawa kung diin ang iyang asawa nga si Diana Oberes hustisya gyud gihapon ang gisyagit.
Mihangyo na usab ang ilang kampo sa PNP, Central Command ug ingon man sa AFP nga paningkamotan nga mapaspasan ang pagpangita sa gawasnon pang mga suspek sa pagpatay sa iyang bana.
Gihimug-atan niini nga bisan paman ug adunay kamatooran ang tanang alegasyon nga nakasala ang iyang bana sa ilang kaminyoon dili pa gihapon igo ug maka-angayon ang gidangatan sa iyang bana. Nakalapas matud pa sa balaud ang mga suspek hayan kinahanglan nga manubag ang mga nakasala.
Nagpadala na usab sila ngadto ni Presidential Assistant for the Visayas, Michael Lloyd kalabot sa tabang para sa ilang kaso ug nanghinaot sila nga musanong dayon ang presidente niini sanglit maayo matud pa nga sundalo si Sgt. Oberes.
Hugot usab ang paglaom ni Diana nga dili madugay mupatigbabaw ra gyud ang kamatooran.
