CEBU CITY — Dili iwakli sa kapulisan ang anggulo sa politika sa kamatayon sa kontrobersyal nga negosyante nga si Ruben Feliciano.
Gibutyag ni Cebu City Police Office Director, Police Colonel Josefino Ligan, nga dili malilong nga init ang eleksyon niadtong 2019 tali sa mga Reluya ug ni Feliciano sa lungsod sa San Fernando, apan giingong wala pa gayu’y ebidensiya o impormasyon nga mag-link niini sa nahitabong krimen.
Matud ni Ligan nga dugay na ang maong eleksyon, apan lakip kini sa ilahang lantawon nga anggulo.
Sigon pa nga limitado pa gayud ang impormasyon nga ilahang nakuha sa pagkakarun ug padayon pa sila nga nagsubay sa mga Close Circuit Television Camera (CCTV) nga anaa sa area sa krimen.
Giangkon sa police official nga naglisod gayud sila sa pagkuha ug CCTV footages gumikan kay sa lima ka mga establisimento nga naagi-an sa biktima kauban ang pag-umangkon niini, ang giingong wala na mag-function.
Samtang, gitataw usab sa Deputy Chief sa Mabolo PNP nga si Police Lieutenant Pablito Saldo, nga nagkatakdo ang gidudahan sa pag-umangkon ni Feliciano nga si Kim Feliciano kinsang angol sa naasoy nga insidente, ug ang kapuyo sa biktimang negosyante, nga kabahin sa negosyo ang motibo sa pagpamanhig.
Nagkanayon si PLt. Saldo nga sa pagkakarun, wala pa sila’y lain nga gilantaw nga motibo sa maong krimen.
Nasayran sa kapulisan nga adunay ‘construction business’ sa lungsod sa San Fernando si Feliciano.
Hinuon, gihimug-atan sa deputy chief nga nagkinahanglan pa kini ug mas lawom nga imbestigasyon arun nga masayran nga ti-unay nga hinungdan sa pagpusil patay sa negosyante, ingon man ang pagsuta sa mga suspek sa krimen.
