CEBU CITY-Gikasubo ni Cebu City Vice Mayor Michael Rama ang nahitabo nga pagpamanhig kagahapong adlawa nga nahitabo sulod sa dakbayan sa Sugbo.
Gipahibalo sa bise mayor sa dihang nahinabi sa Bombo Radyo Cebu nga sa wala pa mahitabo ang pagpamanhig, giingung nagpulong pa kini kauban ang kapulisan kung diin ilahang gihisgutan ang general public safety kalabot na sa naghinangat nga Kalag-Kalag ug Pasko.
Matud ni Rama nga ‘shocking’ ug ‘very condemnable’ ang maong insidente hinungdan nga angayan gayud kini nga sulbaron sa kapulisan.
Hinuon, gitataw sa opisyal nga dako ang suporta niini sa kapulisan ug nagtuo kini nga bisan pa man sa dakung hagit sa pagkab-ut sa hustisya hayan masulbad ug masikop ang mga mamumuno.
Kahinumdoman nga kagahapong adlawa gibanhigan patay si Clarin, Misamis Occidental Mayor David Navarro sa dalan M.Velez, Barangay Guadalupe, dakbayan sa Sugbo kung diin natusak-tusak sa bala ang kalawasan niini.
