CEBU CITY — Pag-ampo ug paghatag og tabang sa mga medical frontliners ang gihatagan karon og pagtagad sa Basilica Minore del Sto. Niño ning nasinating krisis tungod sa COVID-19.
Matud ni Fr. Pacifico Nohara Jr., OSA, ang rector sa simbahan, nga nagpadayon ang bayanihan diin nagtinabangay ang mga volunteers sa paghimo og personal protective equipment (PPE).
Kini aron gamiton sa mga medical frontliners kinsang nagtinabangay aron maluwas ang mga pasyente gikan sa makamatay nga COVID-19.
Samtang gisuroy-suroy usab ang imahe sa balaang bata matag gabii sa mga nag-unang kadalanan sa Sugbo alang sa kaluwasan sa matag usa.
Awhag karon ni Fr. Nohara sa mga gustong moabag og tabang nga mahimo kanang ipadangat ngadto sa Basilica.
Samtang gidayeg mismo ni Cebu City Councilor Dave Tumulak ang inisyatiba sa Archdiocese of Cebu diin gipapuyo una sa simbahan ang mga tawo nga naglaroylaroy sa gawas ug walay kapuy-an.
Matud ni Tumulak nga gipakaon ug gi-atiman sa mga kaparian ang nahisgutang mga indibidwal apan dili gayud sila makagawas-gawas pa.
Kini nunot na sa gipatumang enhanced community quarantine sa Sugbo.
