CEBU CITY-Gipadayon na ang pagpang-aspalto sa mga kadalanan sulod sa dakbayan sa Sugbo ilabi na sa bukirang mga barangay niini sugod niadtong Enero 31, 2025.
Sumala pa sa Cebu City Department of Engineering and Public Works (DEPW) nga ang ilang trabahoon sa pagkakaron kay didto sa Barnagay Pamutan ug Adlaon sa bukirang dakbayan.
Samtang aduna pud gipahigayon nga road patching sa mga libaong sa V Rama Avenue sa Barangay San Nicolas Proper ug Pahina Central.
Dugang sab nga gitrabaho karon kay didto pud sa Barangay Guadalupe ug Punta Princesa.
Gisugdan ang pagpang-aspalto sa kadalanan ilabi na sa kabukiran subay sa mando ni Cebu City Mayor Raymond Alvin Garcia nga dugay nang gisugyot sa mga lumulupyo ug opisyales sa barangay niini tungod sa kapakyas sa nakalabayng administrasyon sa pagtubag niini.
Gani gidugang sa Mayor nga dili kini mamahimong mahuman dayon tungod sa kadaghan og dapat matapos kini nga adunay kalidad ang pagtrabaho.
