CEBU CITY- Giklaro ni Dr. Christopher Ryan Maboloc, usa ka inilang Political Analyst, nga bisan tuod adunay kamatuoran ang pangangkon sa Israel nga usa ka “existential threat” ang Iran tungod sa mga bahad niini kaniadto, ang kamatuoran mao nga wala pa sa maong lebel o estado ang Iran sa pagpalambo sa ilang nuclear weapons.
Sa eksklusibong pakighinabi sa Bombo Radyo Cebu, gidugang ni Maboloc nga tungod kay wala pay “immediate threat” ang Iran batok sa Israel, ang kasamtangang lihok ni US President Donald Trump ug ang pag-instigate ni Prime Minister Benjamin Netanyahu, maisip nga usa ka kalapasan sa International Law.
Matud niya, walay moral ug legal nga awtoridad ang maong mga lider sa paghimo sa maong lakang.
Samtang, gipahayag usab ni Maboloc nga ang lawom nga rason luyo sa walay hunong nga pagpangatake sa Estados Unidos ug Israel mao ang tinguha alang sa usa ka “regime change.”
Kini tungod kay giila nila Trump ug Netanyahu ang lider sa Iran nga si Ali Hosseini Khamenei nga usa ka dakong babag sa ilang mga politikanhong katuyuan.
Gihisgutan usab ni Maboloc ang kasaysayan sa nuclear agreement tali sa Iran ug sa administrasyon ni kanhi President Obama, diin mi-atras si Trump sa maong kasabutan human ang pagpamomba sa pipila ka gituohang nuclear sites sa Iran.
Sa kasamtangan, matod ni Maboloc, ang tumong ni Trump mao ang hingpit nga pag-dismantle sa military hardware ug kapasidad sa Iran, ilabi na ang ilang ballistic missiles nga adunay kakayahan nga magdala og nuclear warheads.
Sa laktod nga pagkasulti, ang panglantaw ni Maboloc mao nga buot gayod piangan ni Trump ang kusog sa Iran.
