Wala nagpasabot nga gawasnon na si Bise Presidente Sara Duterte sa iyang mga tulubagon human giatras ang 3 ka impeachment articles, tungod kay ang mga alegasyon nga gilakip niini mahimo gihapong ipadayon pinaagi sa laing mga legal nga proseso.
Kini ang gipahayag ni Akbayan party-list Rep. Perci Cendaña, kinsa mipasabot nga ang desisyon sa prosecution nga tangtangon ang tulo ka mga sumbong usa ka estratehiya aron mapadali ang resolusyon sa kaso sa impeachment batok sa Bise Presidente.
Matud ni Cendaña nga importante nga dili madugay ang dagan sa mga proseso, tungod ang dugay nga proseso mahimong makapabor sa gireklamo ug mahimong hinungdan sa pagkawala sa interes sa publiko sa maong kaso.
Diin ang mga sumbong nga gi-atras naglakip sa Article I, nga mahitungod sa giingong sayop nga paggamit sa confidential funds; Article III, mahitungod sa pagdawat og suborno; ug Article IV, mahitungod sa seryosong mga hulga.
Bisan pa niana, nagkanayon si Cendaña nga mahimo gihapong pasakaan og laing mga kaso batok kang Duterte nga naglangkob sa iyang panahon isip Bise Presidente ug isip Sekretaryo sa Department of Education (DepEd) ilabi na mahitungod sa paggamit sa confidential ug intelligence funds, subay sa kasamtangang mga balaod ug legal nga mga proseso.
Gipunting usab niya ang pinal nga desisyon sa Commission on Audit (COA) nga nagdeklarar nga dili madawat (disallowance) ang P73.287 milyon nga confidential expenses sa Office of the Vice President (OVP), nga mahimong basehan alang sa dugang nga aksyon sa Office of the Ombudsman.
Matod ni Cendaña, importante ang paggamit sa mga legal nga mekanismo aron masiguro ang tulubagon mahitungod sa paggamit sa pondo sa publiko. Gisuportahan usab niya ang panawagan nga tangtangon ang “classified” nga status sa confidential funds nga gigahin alang kang Duterte, aron masusi sa publiko ug sa mga awtoridad kung giunsa paggamit ang maong mga pondo.
Bisan pa sa pag-atras sa tulo ka mga sumbong, ang Article II—nga mahitungod sa giingong bahandi ni Duterte nga dili mapatin-aw ang gigikanan—nagpabilin nga gihisgotan sa impeachment trial. Gidawat sa impeachment court sa Senado ang pag-atras sa prosecution niadtong Oktubre 13.
Ang husay gikatakdang ipadayon karong Nobyembre 9, diin gilauman nga ipresentar sa defense team ni Duterte ang ilang habig.
