Gisuspenso sa Commission on Elections (COMELEC) ang pag-imprenta sa mga opisyal nga balota para sa Bangsamoro Parliamentary Elections human giaprobahan sa Bangsamoro Transition Authority (BTA) Parliament ang balaodnon nga nag-apod-apod pag-usab sa pito ka parliamentary seats nga orihinal nga gitagana alang sa probinsiya sa Sulu.
Matod ni COMELEC Chairman George Erwin Garcia nga gikatakdang sugdan karong adlawa ang pag-imprenta sa mga balota para sa Basilan, Tawi-Tawi, ug Special Geographic Area (SGA), apan nalangan tungod sa pagpasar sa 3rd ug final reading sa Parliament Bill No. 351.
Ang balaudnon nagtinguha sa pag-amendar sa Bangsamoro Autonomy Act No. 58 ug pag-apod-apod pag-usab sa pito ka mga lingkoranan sa Sulu human ang Korte Suprema mihukom niadtong 2023 nga ang probinsiya dili sakop sa Bangsamoro Autonomous Region in Muslim Mindanao (BARMM), kay gisupak niini ang Bangsamoro Organic Law sa 2019 nga plebisito.
Ubos sa bag-ong dibisyon, ang Lanao del Sur makakuha og siyam ka puwesto, Maguindanao del Norte ug Maguindanao del Sur makakuha og lima ka lingkuranan matag usa, Basilan makakuha og upat, Tawi-Tawi makakuha og upat, Cotabato City makakuha og tulo, ug ang Special Geographic Area makakuha og duha.
Giklaro ni Garcia, nga nagpaabot pa ang poll body sa opisyal nga kopya sa maong balaudnon aron mahibaw-an kung ipatuman ba dayon kini sa umaabot nga piniliay o sa 2028 elections.
Kon mapasar kini sa dili pa ang Oktubre, kinahanglang ablihan na usab ang filing sa certificates of candidacy tungod sa kausaban sa gidaghanon sa mga lingkoranan, nga makaapekto usab sa template sa nawong sa balota.
Hinuon gipasalig usab ni Garcia nga madayon ang Bangsamoro Parliamentary Elections karong Oktubre 13 ning tuiga, 73 o 80 man ka puwesto sa parliament.
