Cebu City- Problema sa pamilya maoy gilantaw karon nga rason sa paghikog patay sa usa ka 24 anyos nga lalaki sa Pag Ibig Fund Building Bro. Luz ning dakbayan sa Sugbo.
Ang biktima giila nga si Anthony Ang kinsang nagtrabaho usab sa Pag Ibig Fund isip accounting support assistant, milayat gikan sa ika 12 nga andana sa maong building pasado 6:30 ganihang buntag.
Matud ni SPO1 Antonio Din nga nahinabi niini ang inahan sa biktima diin matud pa nga duna silay problema sa ilang pamilya. Hinuon wala na gibutyag sa inahan kung unsa gayud nga matang sa problema sa pamilya ang gisagubang sa biktima.
Apan giangkon sa inahan nga nagkalalis si Anthony ug sa igsuon niini sa milabayng adlaw.Gihimakak usab sa habig sa pamilya nga gumikan sa uyab maong naghikog si Ang sanglit matud pa nga wala man kini uyab.
Susamang nag merida na usab daan ang naghikog nga si Anthony Ang sa iyahang mga kaubanan sa wala pa niini gihimo ang paglayat sa building ganihang buntag. Matud ni SPO1 Din, basi sa iyang pakighinabi sa mga kauban sa trabaho sa biktima, kagabie palang nag padala na kini ug text message sa mga kaubanan niini nga nangayo og pasaylo sa iyang mga nabuhat nga sayop ug pag absent sa trabaho.
Hinuon wala gilauman sa mga katrabaho niini nga mulayat kini sa ilang trabahuan ug duna diay gisagubang nga bug-at nga problema.
Samtang , matud pa ni Din nga duna may nakabantay nga naa na sa ibabaw nga bahin sa building si Ang apan wa gyud kini mapugngan sa iyang pag-ambak.
Gimando usab ni Cebu City Police Office Director Police Sr. Supt Royina Garma nga imbestigaran ang maong kaso.
