Gikompirmar sa Department of the Interior and Local Government (DILG) nga ang plano ni Police Gen. Nicolas Torre III nga mohimo og reshuffle sa han-ay sa Philippine National Police (PNP) maoy usa sa rason sa iyang pagka-“relief” sa iyang katungdanan.
Matud ni DILG Secretary Jonvic Remulla nga ang Napolcom orders, usa sa mga gikonsiderar sa Presidente aron tangtangon kini sa posisyon.
Dugang pa ni Remulla, ang National Police Commission (Napolcom) nimando kang Torre nga bawion ang reassignment sa pipila ka dagkong opisyal, lakip na si Police Lt. Gen. Jose Melencio Nartatez Jr., ang ikaduhang labing taas nga opisyal sa PNP nga gibalhin ni Torre sa Mindanao.
Sa opisyal nga pamahayag sa Napolcom, ang appointment nga gihimo wala moagi sa en banc approval sa komisyon, nga adunay administrative powers ubos sa Republic Act 6975 o DILG Act.
Gihulagway pa ni Remulla nga lisod apan gikinahanglan ang desisyon sa paghulip kang Torre, ug giingong gihimo alang sa “national interest” sa nasod.
Gikanayon usab ni Remulla nga hugot nga nibarog si Presidente Ferdinand Marcos Jr. nga ang “security apparatus” nga gilatid sa ilawom sa balaod kinahanglan molihok, ug tahuron ang papel sa Napolcom.
Samtang si Senador Panfilo Lacson niingon nga tungod sa pagpasobra, gitaktak si Torre isip hepe sa National Police.
Si Lacson niingon nga si Torre milihok nga “labaw sa iyang awtoridad” human siya giingong gitaktak ang iyang second-in-command, si Nartatez Jr., nga matud niya kasagarang nagkinahanglan og clearance gikan sa Presidente o sa DILG secretary.
Giklaro usab ni Remulla nga adunay opsyon si Torre nga moretiro o magpabilin sa serbisyo.
