CEBU CITY — Wala na masorpresa si kanhi PhilHealth Anti-Fraud Legal Officer Atty. Thorrsson Keith sa pagkanaug sa pwesto ni PhilHealth President ug CEO Ricardo Morales.
Gikahibulong pa niini kung nganong nadugay pa ang pagkanaug ni Morales sa pwesto, bisan pa man ug dugay na niini nga nasayran ang mga kahiwi-an nga nahitabo sa PhilHealth.
Matud ni Atty. Keith nga isip usa ka sundalo, angayan unta nga barugan ni Morales ang binuhatan niini, ug kaniadto pa mikanaug sa pwesto.
Apan giingong susama nga nagmagahi pa ang opisyal ug nagpaka-arun-ingnon nga wala’y kalabotan sa nahitabong korapsyon.
Gihimug-atan sa PhilHealth whistleblower nga daghang ebidensya batok kang Morales hinungdan nga gisiguro niini nga makasohan ug mapriso ang naasoy nga opisyal bisan pa man ug kini mikanaug na sa pwesto.
Nanghinaut karun si Atty. Keith nga makig-alayon si Morales ug uban pang mga nalambigit, sa imbestigasyon ug mupadayag sa kamatuoran arun nga mahatagan ug hustisya ang katawhang Pilipino. /SBR
