Gipahibalo sa Department of Science and Technology-Philippine Atmospheric, Geophysical and Astronomical Services Administration (DOST-PAGASA) ang pagsaka sa status ngadto sa advisory level human makompirmar ang presensya sa El Niño sa tropical Pacific niadtong Hunyo 9, 2026.
Gilauman nga magpadayon ang maong kondisyon sa mosunod five overlapping three-month periods nga mga panahon nga adunay tsansa nga 80% o mas taas pa, diin makasinati ang Central Visayas og ubos hangtod sa hapit normal nga gidaghanon sa ulan.
Matod sa datus sa PAGASA-7 nga gipresentar sa tigom sa disaster preparedness cluster, nakatala ang rehiyon og ubos kaayo nga ulan sa bulan sa Abril, samtang mibalik kini sa hapit normal nga lebel sa Mayo.
Gipanglantawan nga makasinati og ubos sa normal nga ulan ang Sugbo sa Agosto nga anaa lang sa 41 hangtod 80%, apan gilaumang mupatong na sa 81 hangtod 120% o hapit normal nga lebel ang tibuok rehiyon inabot sa Septiyembre.
Nagdala og dakong hulga ang maong El Niño sa nagkadaiyang sektor sa rehiyon bisan pa man sa presensya sa mga sistema sa panahon sama sa habagat, intertropical convergence zone, lokal nga pagpangatubang sa thunderstorms, bagyo, ug low-pressure areas gikan Hunyo hangtod Nobiyembre.
Samtang sa agrikultura, posibleng magresulta kini sa pagkadaot sa yuta, pagkunhod sa abot sa mga pananom, ug pagdaghan sa mga peste ug sakit, samtang ang suplay sa tubig ug kuryente mamahimo usab nga makulangan, uban sa posibleng pag-atake sa red tide nga makapakunhod sa kuha sa isda.
Tungod niini, giawhag ang mga opisyal sa lokal nga kagamhanan ug ang publiko sa paghimo og mga lakang pinaagi sa pagbasa sa mga binuwan nga climate advisories, pagpakig-alayon sa mga opisina sa DRRM, pagmonitor sa lebel sa tubig, pagkuha og crop insurance, ug pag-set sa air conditioning units ngadto sa 22 hangtod 25 degrees Celsius aron makadaginot sa enerhiya.
Gimandoan usab sa PAGASA, pinaagi sa ilang giya nga “Giya sa El Niño” ubos sa Payong PAGASA program, ang matag panimalay sa pagdaginot sa tubig, paggamit og usab sa tubig-hinugasan, ug paglikay sa paghugas sa sakyanan panahon sa grabeng hulaw.
