Pagbangotan sulod sa 6 ka buwan ngadto sa 1 ka tuig, normal ra – DOH

Mipahayag ang Department of Health (DOH) nga normal ang pagbangotan human sa kamatayon sa kapamilya o suod nga higala.

Sumala sa ahensya, ang pagbangotan mahimong molungtad gikan sa unom ka buwan hangtod sa usa ka tuig.

Gipasiugda sa DOH nga kung mawad-an og minahal sa kinabuhi, normal nga mobati og grabeng kasubo ug kaguol nga mahimong molungtad gikan sa 6 ka buwan hangtod sa 1 ka tuig.

Dugang pa niini nga adunay lain-laing mga paagi sa pag-ayo, ug mga paagi sa pagbalik sa normal nga mga kalihokan bisan pa sa kasubo.

Gipahinumdoman sa DOH nga kung kinahanglan og kaistorya, tawagi ang National Center For Mental Health Crisis Hotline 1553 diin adunay mga tawo nga andam maminaw ug mosuporta sa mga problemang giatubang.