Gipaabot karon sa Department of Health (DOH) ang pagsaka sa ihap sa mga pasyente sa mga pampublikong tambalanan.
Kini nunot sa pahibalo ni Presidente Ferdinand Marcos Jr. sa iyang ikaupat nga estado sa nasod nga libre ang basic accommodation sa mga pasyente nga na-admit sa mga tambalanan nga gilangkoban sa DOH.
Matod ni Health Secretary Ted Herbosa, bisan og maabot na ang bed capacity limit sa mga publikong tambalanan, ang mga pribadong tambalanan i-tap aron mahatagan og 10% sa ilang mga higdaanan nga katumbas sa batakang kapuy-an sa mga ospital sa gobyerno.
Matod niya ang bayad sa mga pribadong tambalanan abagahon sa Philippine Health Insurance Corporation (PhilHealth).
Hinuon, matud niya nga adunay mga higayon nga ang mga pasyente kinahanglan pa nga mobayad og co-pay ilabi na kung na-confine sa government-owned and controlled corporations (GOCC) hospitals sama sa kidney institute, heart center, lung center ug children’s medical center, bisan pa man adunay mga benefit packages nga ma-avail sa mga pasyente.
Giwagtang usab sa DOH ang mga kabalaka bahin sa pagpadayon sa zero balance billing.
Matod sa ahensya, ang mga pakete sa PhilHealth kanunay nga gisusi ug ang ilang coverage gipalapdan. Importante usab ang pundo nga gihatag ngadto sa ahensya, nga kinahanglang usbawan og 15% ang maintenance operating expense (MOE) niini aron mapadayon ang way balance billing.
Bisan pa niini, matud niya wala siyay nakitang pagsaka sa ilang tinuig nga pundo sa tuig 2026 tungod kay gipaabot niya nga mas molambo pa ang pagpasiugda sa maayong panglawas ug paglikay sa sakit pinaagi sa hustong nutrisyon, ehersisyo, disiplina, ug check-up ubos sa YAKAP program.
