CEBU – “Overkill”. Kini ang pulong nga gipadayag ni Dr. Rene Josef Bullecer subay na sa kamandoan sa Department of Transportation (DOTr) nga nagdili sa mga pasahero nga nagdala ug karne sa baboy nga musakay ug bisan unsa nga Public Utility Vehicle (PUVs).
Gihimug-atan ni Dr. Bullecer nga nanghinobra lang ang maong pamaagi sa paglikay sa African Swine Fever (ASF).
Matud pa nga kinahanglan nga hinumdoman sa publiko, ingon man sa mga namunoan sa matag departamento sa gobyerno nga dili makatakod sa tawo ang ASF ug nag-agi man kini ug istrikto nga inspeksyon una nga gibutang sa mga kamerkadohan ug bisan sa mga dagko nga supermarkets.
Dugang pa, giingong bisan ang mga live hogs dinhi sa Sugbo dili man basta nga ibyahe kung dili mag-agi ug inspeksyon hayan gitawag ni Dr. Bullecer nga ‘over reaction’ ang kamandoan nga gipagawas sa DOTr.
Gipadayag sa maong doctor nga walay basihanan ang DOTr arun nga mupagawas ug kamandoan nga makaapekto sa kinabag-ang mga ‘commuters’.
Nagkanayon si Bullecer nga dili ang ASF ang makamatay sa tawo inay ang cholesterol nga gikan sa kanunay nga pagkaon ug baboy.
Samtang, wala makita ni Tudela Mayor Greman ‘Jojo’ Solante ang ‘logic’ sa kamandoan sa Department of Transportation (DOTr) nga nagdili sa mga pasahero nga musakay ug Public Utility Vehicles (PUVs) kung nagdala ug karne sa baboy.
Gibutyag ni Mayor Solante nga dili tanan adunay pribado nga sakyanan ug mayorya sa publiko ang nag-commute lang hinungdan nga giingong wala kini makasabot sa maong kamandoan.
Matud sa mayor nga dako usab kini nga pahat sa industriya sa mga hog raisers gumikan kay mahulog nga wala na’y halin ang karne sa baboy kung dili naman usab makasakay ang mga mamalitay niini ug pangpubliko nga sakyanan.
Hinuon, giklaro ni Solante nga wala pa kini makadawat sa maong kamandoan gikan sa DOTr.
Gikataw-an usab ni Cebu City Department of Veterinary, Medicine and Fisheries (DVMF) Head Dr. Jennifer Laurente, ang nahisgutang kamandoan diin matud pa lisod kini alang sa mga kunsumidor nga anaa nagpuyo sa lagyo nga bahin ug kinahanglan gayud nga musakay ug PUJ.
Sigon ni Dr. Laurente nga wala pa mahatagan ang dakbayan sa Sugbo ug kamandoan sa DOTr, apan una na niini nga gipadayag nga dili kini maki-angayon ug wala usab kini makakuha sa tumong ug tuyo niini.
Mipahinumdom si Laurente nga sa dili pa ipagawas ngadto sa mga kamerkadohan, ingon man sa mga dagko nga tindahan, giingong nag-agi ug hugot nga inspeksyon ang mga karne sa baboy subay na sa African Swine Fever outbreak.
