Cebu City- Emosyunal nga nangayo karon og hustisya ang mga kabanay sa pulis nga usa sa 4 ka mga biktima sa pagpamanhig sa Sitio Ranger Brgy. Pooc dakbayan sa Talisay Cebu.
Positibong giila sa iyang mga anak ang biktima nga si PO3 Micahel Santino Cortes, usa ka aktibo nga pulis ug kasamtangang naka assign sa Mindanao.
Matud sa igsoon niini nga si Delia Cortes Comidero nga mao palang pag-uli sa biktima karong semanaha sa Sugbo para mutambong sa iyang hearing sa dakbayan sa Barili. Gikan matud pa sa hearing ang biktima ug padulong na ulo sa ilang balay sa Brgy. Pooc sa nahitabong insidente.
Nagtoo ang pamilya nga mistaken identity lang ang nahitabo ilabina nga kapangalan matud pa sa usa ka PO2 Michael Cortez ang biktima kinsang nalakip sa listahan ni Presidente Rodrigo Duterte .
Gihimakak sa pamilya nga nalambigit sa iligal nga drogas si Micahel. Nanawagan usab kini ni Presidente Duterte nga tabangan silang matagaan og hustisya ang pagkamatay sa ilang igsoon.
Wala pa usab ma- identify sa PNP ang usa pa nga namatay nga kauban ni PO3 Cortes sa sakyanan.
