Gibutyag sa Department of Justice nga posibleng may kalambigitan ang nagpadayong ‘war on drugs’ sa kaso sa mga nangawala nga sabungero.
Kini ang gikompirmar ni Justice Secretary Jesus Crispin Remulla.
Matod sa nasangpit nga kalihim, ilang nakit-an ang koneksyon tali sa pagkasikop sa pipila ka mga suspek nga nalambigit sa ilegal nga drugas ug sa kaso sa mga nangawala nga sabungero.
Sa padayong imbestigasyon, ila kining nadiskubrehan ug nasuta nga managrelasyon ang duha ka suspek nga nasikop sa Meycauayan, Bulacan.
Hinuon, giangkon ni Justice Secretary Remulla nga adunay problema ang nasangpit nga kaso tungod kay matud niya adunay recantation sa pipila ka mga indibidwal nga giingong gi-interview sa maong departamento.
Dugang pa niini, nga ang ‘death squad’ sa ‘war on drugs’ nakita usab nga konektado sa giingong pagpatay sa mga missing sabungero.
Paambit niya nga usa kini sa mga anggulo nga ilang nakita sa imbestigasyon tungod kay dunay mga indibidwal nga giingong nalambigit sa pagpamatay sa drug war, kay nalambigit usab sa pagpatay sa mga mananari.
Hinuon, giklaro sa kalihim nga ila pa kining gitun-an pag-ayo aron mapamatud-an ug maestablisar ang nadiskobrehan nga koneksyon tali sa ‘war on drugs’ ug sa pagkahanaw sa mga sabungero.
Samtang, padayon pa ang imbestigasyon nga gipangulohan sa Department of Justice sa tumong nga maresolbar ang kaso.
Gilusad usab ang search and retrieval operations sa Taal Lake area aron matigom ang mga espisipikong ebidensiya nga magamit sa paghimo sa kaso sa departamento.
